കെ സുധാകരൻ ചികിത്സയിൽ; നാളത്തെ രാഷ്ട്രീയകാര്യസമിതി യോഗം മാറ്റിവെച്ചു
നാളെ ചേരാൻ നിശ്ചയിച്ചിരുന്ന കോണ്‍ഗ്രസിന്റെ രാഷ്ട്രീയകാര്യസമിതി യോഗം മാറ്റിവെച്ചു. കെപിസിസി പ്രസിഡന്റ് കെ സുധാകരൻ ചികിത്സയിലായതിനാലാണ് യോഗം മാറ്റിവെച്ചത്. നാളെ രാവിലെ 10.30 ന് കൊച്ചിയിൽ യോഗം ചേരാനാണ് നേരത്തെ തീരുമാനിച്ചിരുന്നത്.
ആർഎസ് എസുമായി ബന്ധപ്പെട്ട കെ സുധാകരന്റെ വിവാദ പ്രസ്താവനകൾ യോഗത്തിൽ ചർച്ചയായേക്കുമെന്ന് സൂചനകളുണ്ടായിരുന്നു. സുധാകരന്റെ പ്രസ്താവന കോൺഗ്രസ് നേതാക്കൾക്ക് പുറമെ യുഡിഎഫിലും അതൃപ്തിക്ക് ഇടയാക്കിയിരുന്നു. സുധാകരന്റെ പ്രസ്താവനയെ പ്രതിപക്ഷ നേതാവ് വിഡി സതീശനും യുഡിഎഫ് കണ്‍വീനര്‍ എംഎം ഹസനും തള്ളിപ്പറഞ്ഞിരുന്നു.
അതേസമയം വിവാദപ്രസ്താവനയില്‍ എഐസിസി കെ സുധാകരനോട് വിശദീകരണം തേടിയിട്ടുണ്ട്. എഐസിസി ജനറല്‍ സെക്രട്ടറി താരിഖ് അന്‍വര്‍ സുധാകരനുമായി ഫോണില്‍ സംസാരിച്ചു. താരിഖ് അന്‍വര്‍ ഉടന്‍ കോണ്‍ഗ്രസ് ഹൈക്കമാന്‍ഡിന് റിപ്പോര്‍ട്ട് നല്‍കും. ആര്‍എസ്എസ് ശാഖകള്‍ക്ക് സംരക്ഷണം നല്‍കി എന്നതും, നെഹ്‌റുവുമായി ബന്ധപ്പെട്ട പരാമര്‍ശവുമാണ് വിവാദമായത്.
