പ്രേക്ഷകര്‍ക്ക് നവരാത്രി ഓഫറുമായി ‘ബ്രഹ്‍മാസ്ത്ര’ നിര്‍മ്മാതാക്കള്‍; നാല് ദിവസം ടിക്കറ്റിന് കുറഞ്ഞ നിരക്ക്
പരാജയത്തുടര്‍ച്ചകളില്‍ നിന്ന് തങ്ങളുടെ സിനിമാ വ്യവസായത്തെ തിരിച്ചെത്തിച്ച ചിത്രമാണിപ്പോള്‍ ബോളിവുഡിനെ സംബന്ധിച്ച് ബ്രഹ്‍മാസ്ത്ര. വലിയ പ്രതീക്ഷയുണര്‍ത്തി എത്തിയ അക്ഷയ് കുമാര്‍, ആമിര്‍ ഖാന്‍ ചിത്രങ്ങള്‍ പോലും ബോക്സ് ഓഫീസില്‍ തകര്‍ന്നുവീണിടത്ത് മികച്ച ഓപണിംഗ് ആണ് ബ്രഹ്‍മാസ്ത്രയ്ക്ക് ലഭിച്ചത്. ആഗോള ബോക്സ് ഓഫീസില്‍ നിന്ന് ഒരാഴ്ച കൊണ്ട് 300 കോടി നേടിയ ചിത്രത്തിന്‍റെ 10 ദിവസത്തെ നേട്ടം 360 കോടി ആയിരുന്നു. ഇപ്പോഴിതാ പ്രേക്ഷകര്‍ക്കു മുന്നില്‍ ഒരു ഓഫറുമായി എത്തിയിരിക്കുകയാണ് അണിയറക്കാര്‍. കുറഞ്ഞ ടിക്കറ്റ് നിരക്കില്‍ ചിത്രം കാണാനുള്ള ഓഫര്‍ ആണ് അത്.
ഇതു പ്രകാരം ടിക്കറ്റ് ഒന്നിന് 100 രൂപയാണ് നല്‍കേണ്ടത്. ജിഎസ്ടി ഉള്‍പ്പെടാതെയുള്ള തുകയാണ് ഇത്. നവരാത്രി ആഘോഷങ്ങളുടെ ഭാഗമായി നാളെ മുതല്‍ (26) 29 വരെയാണ് ചിത്രത്തിന്‍റെ ടിക്കറ്റുകള്‍ ഈ നിരക്കില്‍ ലഭിക്കുക. മള്‍ട്ടിപ്ലെക്സ് അസോസിയേഷന്‍ ഓഫ് ഇന്ത്യയുടെ ആഹ്വാനപ്രകാരം പല സംസ്ഥാനങ്ങളിലും തിയറ്റര്‍ ഉടമകള്‍ 23-ാം തീയതി ദേശീയ ചലച്ചിത്ര ദിനമായി ആചരിച്ചിരുന്നു. ഇതുപ്രകാരം ഏത് സിനിമയുടെയും ഏത് ഷോയ്ക്കും 75 രൂപയായിരുന്നു ഒരു ടിക്കറ്റിന്. കാണികളെ വലിയ തോതില്‍ തിയറ്ററുകളിലേക്ക് ആകര്‍ഷിക്കാന്‍ ഈ ഓഫര്‍ മൂലം തിയറ്റര്‍ ഉടമകള്‍ക്ക് സാധിച്ചിരുന്നു. അതേസമയം കേരളമുള്‍പ്പെടെ പല സംസ്ഥാനങ്ങളിലും ഈ ഓഫര്‍ ലഭ്യമായിരുന്നില്ല.
